பாபர் மசூதி இடிப்பு வழக்கு: அத்வானி, பால் தாக்கரேக்கு உச்சநீதிமன்றம் நோட்டீஸ்

பாபர் மசூதியை இடிக்க சதி செய்ததாக சிபிஐ தொடர்ந்த வழக்கில் விளக்கம் அளிக்குமாறு பாஜக தலைவர்கள் அத்வானி, முரளி மனோகர் ஜோஷி, சிவசேனைத் தலைவர் பால் தாக்கரே உள்ளிட்டோருக்கு உச்சநீதிமன்றம் நோட்டீஸ் அனுப்பி உள்ளது.



பாபர் மசூதி இடிக்கப்பட்ட வழக்கை விசாரித்த அலகாபாத் உயர் நீதிமன்றம், மசூதியை இடிக்க கரசேவகர்களை தூண்டிவிட்டதாக அத்வானி மற்றும் 20 பேர்களுக்கு எதிராக பதிவு செய்யப்பட்ட கிரிமினல் குற்றச்சாட்டுகளை நீக்குமாறு இவ்வழக்கை விசாரித்த மத்திய புலனாய்வுக் கழகமான சிபிஐ-க்கு உத்தரவிட்டிருந்தது.

இந்த உத்தரவை எதிர்த்து உச்ச நீதிமன்றத்தில் சிபிஐ மேல்முறையீட்டு மனு தாக்கல் செய்திருந்தது.

1992-ல் பாபர் மசூதியை இடிக்க சதி செய்ததாக சிபிஐ தொடர்ந்த வழக்கில் விளக்கம் அளிக்குமாறு பாஜக தலைவர்கள் அத்வானி, முரளி மனோகர் ஜோஷி, சிவசேனைத் தலைவர் பால் தாக்கரே உள்ளிட்டோருக்கு உச்சநீதிமன்றம் நோட்டீஸ் அனுப்பி உள்ளது.


அம்மனுவில், அத்வானி உள்ளிட்டவர்களுக்கு எதிரான கிரிமினல் சதி குற்றச்சாட்டுக்கள் தொடர்பாக அலகாபாத் உயர் நீதிமன்றம் சரியான முடிவுக்கு வரவில்லை என்றும், எனவே அவர்களுக்கு எதிரான குற்றச்சாட்டுக்களை மீண்டும் விசாரிக்க உத்தரவிட வேண்டும் என்றும் சிபிஐ கூறியுள்ளது.

இந்நிலையில் இம்மனுவை இன்று விசாரித்த உச்ச நீதிமன்றம், அத்வானி மற்றும் 20 பேர்களும் நான்கு வார காலத்திற்குள் பதிலளிக்க வேண்டும் என்று தாக்கீது அனுப்ப உத்தரவிட்டது.

4 வாரங்களுக்குள் இதுகுறித்து பதில் மனுத்தாக்கல் செய்யுமாறு நீதிபதிகள் வி.எஸ்.சிர்புர்கர் மற்றும் டி.எஸ்.தாக்கூர் ஆகியோர் அடங்கிய பெஞ்ச் அவர்களுக்கு உத்தரவிட்டது.

அத்வானி, முரளி மனோகர் ஜோஷி, பால்தாக்கரே, அசோக் சிங்கால், கிரிராஜ் கிஷோர், வினய் கட்டியார், விஷ்ணு ஹரிடால்மியா, சாத்வி ரிதம்பரா மற்றும் மகந்த் அவைத்ய நாத் உள்ளிட்ட தலைவர்களுக்கு எதிரான குற்றச்சாட்டுகளை சிபிஐ சிறப்பு நீதிமன்றம் நிராகரித்ததை அலகாபாத் உயர்நீதிமன்றமும் கடந்த மே மாதமும் உறுதிசெய்தது.

இதை எதிர்த்து உச்சநீதிமன்றத்தில் சிபிஐ மனுத்தாக்கல் செய்தது. சிபிஐ சார்பில் சொலிசிட்டர் ஜெனரல் கோபால் சுப்ரமணியம் உச்சநீதிமன்றத்தில் ஆஜரானார்.

மத்தியப் பிரதேச முன்னாள் முதல்வர் உமா பாரதி மற்றும் உத்தரப் பிரதேச முன்னாள் முதல்வர் கல்யாண் சிங்கும் இந்த வழக்கில் குற்றம்சாட்டப்பட்டுள்ளனர்.